Noyer «Arsenal»ga qarshi o'yin oldidan «Bavariya» mashg'ulotlariga qaytdi

 20 OKTYABR, 2026, 14:00

«Bavariya» darvozaboni Manuel Noyer Chempionlar ligasida «Arsenal»ga qarshi o'yin oldidan jamoaviy mashg'ulotlarga qaytdi.

BILD nashri ma'lumotiga ko'ra, 40 yoshli futbolchi dushanba kuni umumiy guruh bilan mashg'ulot o'tkazgan. U oyog'idan olgan jarohati sabab jamoasining so'nggi ikkita uchrashuvini o'tkazib yuborgan edi.

Myunxenliklar ertaga kechqurun Chempionlar ligasi doirasida «Arsenal»ga qarshi muhim uchrashuv o'tkazadi.

Noyerning mazkur bahsda ishtirok etish-etmasligi bugungi yakuniy mashg'ulotdan keyingi jismoniy holatiga qarab hal qilinadi.

Agar darvozabonda yangi muammolar yuzaga kelmasa, tibbiy shtab unga maydonga tushish uchun ruxsat berishi kutilmoqda.

Noyerning yo'qligida jamoa darvozasini qo'riqlab kelgan Yonas Urbig esa tajribali posbon o'z vaqtida tiklana olmasa, asosiy tarkibdagi o'rnini saqlab qoladi.

Shu bilan birga, «Bavariya» yarim himoyachisi Jamol Musiala chorshanba kuni «Arsenal»ga qarshi o'yinda ishtirok eta olmaydi.

Futbolchi mushak jarohati tufayli sentyabr oyidan buyon maydonga tushmayapti. U joriy oy oxirida safga qaytishni maqsad qilgan.