Konseysau Ronaldu va Jezush o'rtasidagi mojaro haqida fikr bildirdi

 20 OKTYABR, 2026, 10:34

"Milan", "Portu" va "Al-Ittihod" klublarining sobiq bosh murabbiyi Serjiu Konseysau Portugaliya terma jamoasi hujumchisi Krishtianu Ronaldu hamda bosh murabbiy Jorje Jezush o'rtasidagi kelishmovchilik yuzasidan o'z munosabatini bildirdi.

Portugaliyalik mutaxassisning ta'kidlashicha, mamlakat futbol jamoatchiligida keng muhokama qilinayotgan ushbu vaziyatda tomonlardan birini qo'llab-quvvatlash to'g'ri bo'lmaydi.

"Krishtianu Ronaldu va terma jamoa bosh murabbiyi o'rtasidagi ziddiyat mamlakatimizda juda nozik mavzuga aylangan.

Ularning har ikkisi ham futbol olamida katta nufuzga ega. Ronaldu — jahon miqyosidagi afsona, Jezush esa ulkan tajribaga ega, hurmatga sazovor murabbiy.

Ikkalasiga ham hurmatim baland. Shu sababli bu bahsda kimningdir tarafini olishni to'g'ri deb hisoblamayman", — dedi Konseysau La Tripletta nashriga bergan intervyusida.

Avvalroq Krishtianu Ronaldu UEFA Millatlar ligasining 3-turidan o'rin olgan Daniyaga qarshi uchrashuv oldidan Portugaliya terma jamoasi qarorgohini tark etgani haqida xabarlar tarqalgan edi.

Mazkur bahs portugaliyaliklarning 4:2 hisobidagi g'alabasi bilan yakunlangan.

Jorje Jezush esa hujumchi bilan o'rtasida hech qanday ziddiyat yo'qligini ta'kidlagan. Shunga qaramay, keyinchalik murabbiy Ronaldu bilan yarashuv uchrashuvini o'tkazishga rozilik bergani ham ma'lum qilingan.

Manba: stadion.uz