Evropa futbolida o'z maydonida o'ynash ustunligi tobora yo'qolmoqda

 20 OKTYABR, 2026, 08:24

Evropaning etakchi futbol chempionatlarida o'z maydonida o'ynash ustunligi so'nggi 30 yil davomida sezilarli darajada kamaygan. Balance of Play tomonidan o'tkazilgan keng ko'lamli tadqiqot natijalari shundan dalolat bermoqda.

Tahlil doirasida Evropaning eng kuchli o'nta chempionatida o'tkazilgan jami 97 358 ta uchrashuv natijalari o'rganilgan.

Ma'lum bo'lishicha, 1996/97–2000/01 yilgi mavsumlarda jamoalar o'z maydonida qo'lga kiritish mumkin bo'lgan ochkolarning o'rtacha 57,7 foizini jamg'argan. So'nggi besh mavsumda esa mazkur ko'rsatkich 52,2 foizga tushgan.

Mezbonlarning g'alaba qozonish chastotasida ham pasayish kuzatilgan. Xususan, 2000/01 yilgi mavsumda uchrashuvlarning 49,84 foizi maydon egalarining g'alabasi bilan yakunlangan bo'lsa, 2025/26 yilgi mavsumda bu ko'rsatkich 43,12 foizni tashkil etgan.

Aksincha, mehmon jamoalarning g'alabalari ulushi 24,71 foizdan 31,1 foizgacha o'sgan. Shu davr mobaynida durang natijalar ulushi esa faqat biroz kamaygan.

Tadqiqotga ko'ra, o'z maydonida o'ynash ustunligi eng ko'p Italiya A Seriyasida zaiflashgan. Ushbu chempionatda mazkur ko'rsatkich har o'n yilda 3,31 foizga pasayib borgan.

So'nggi besh mavsumda Italiya klublari uy uchrashuvlarida mavjud ochkolarning atigi 49,44 foizini qo'lga kiritgan. Bu Evropaning etakchi o'nta chempionati orasidagi eng past natija hisoblanadi.

Mazkur raqamlar Evropa futbolida uy maydoni omilining ahamiyati avvalgi o'n yilliklarga nisbatan kamayib borayotganini ko'rsatmoqda.