De Dzerbi «Tottenxem»ning ilk g'alabasidan so'ng muxlislarga murojaat qildi

 20 OKTYABR, 2026, 08:00

«Tottenxem» bosh murabbiyi Roberto de Dzerbi Angliya Premer-ligasining 7-turida «Koventri Siti» ustidan qozonilgan 3:1 hisobidagi g'alabadan keyin o'z fikrlarini bildirdi.

Londonliklar o'z maydonida kechgan bahsda Jeyms Meddison, Omar Marmush va Ben Devisning gollari evaziga raqibdan ustun kelishdi. Bu «shporlar» uchun joriy mavsumdagi Premer-liga doirasida qo'lga kiritilgan ilk g'alaba bo'ldi.

Italiyalik mutaxassis o'yin natijasidan mamnun ekanini ta'kidlar ekan, jamoasining harakatlarida hali ham kamchiliklar borligini yashirmadi.

«Men natijadan, futbolchilarning kayfiyati va jamoaviy ruhidan, shuningdek, o'tkazib yuborilgan golga bildirilgan munosabatdan mamnunman.

Ochig'ini aytsam, bugun avvalgi uchrashuvlardagi kabi yaxshi o'ynay olmadik. Biroq raqibga ham munosib baho berish kerak. Ular himoyada juda yaxshi harakat qilishdi.

Endi biz g'alaba qozona olishimizga ishonishimiz shart. Chunki ketma-ket ikki-uchta shunday mavsumdan keyin psixologik jihat hal qiluvchi ahamiyat kasb etadi.

Muxlislarimizga alohida minnatdorchilik bildirishimiz kerak. Ular so'nggi vaqtlarda juda ko'p qiyinchiliklarni boshdan kechirishdi. Ammo bugungi qo'llab-quvvatlashlari ajoyib bo'ldi», — dedi de Dzerbi BBC Sport nashriga bergan intervyusida.

Ma'lumot uchun, «Tottenxem» etti turdan keyin 6 ochko jamg'argan holda Angliya Premer-ligasi turnir jadvalida 16-o'rinni egallab turibdi.