Superliga 17-turining eng chiroyli goli muallifi aniqlandi (+Video)

 18 AVGUST, 2026, 12:48

O'zbekiston Superligasi 17-turining eng chiroyli goli aniqlandi. Professional futbol ligasi talqiniga ko'ra, "Bunyodkor" yarim himoyachisi Dmitriy Pletnyov tomonidan kiritilgan to'p turning eng yaxshi goli deb topildi.

Pletnyov ushbu golni 14 avgust kuni Namanganda bo'lib o'tgan "Navbahor" — "Bunyodkor" uchrashuvida urgandi. Ikkinchi bo'lim boshida Sardor Abdunabievning uzatmasidan keyin rossiyalik futbolchi raqib darvozasini ishg'ol qilib, hisobni 2:2 ko'rinishiga keltirgan.

Umuman, mazkur bahs haqiqiy gollar shouiga aylandi — jamoalar jami ettita gol urishdi. Yakunda "Navbahor" 4:3 hisobida g'alaba qozondi. "Bunyodkor" safida Sardor Abdunabiev, Dmitriy Pletnyov va Faxriddin Muhammadov gol urgan bo'lsa, mezbonlardan Muhammadali G'iyosov, Husayn Norchaev, Diyor Xolmatov va Ruslanbek Jiyanov o'z nomini tabloga yozdirdi.

28 yoshli Pletnyov 2026 yilgi mavsum oldidan "Bunyodkor" safiga qo'shilgan. U asosan hujumkor yarim himoyachi sifatida harakat qiladi.

Shu tariqa, Pletnyovning Namangandagi zarbasi Superliga 17-turining eng chiroyli goli sifatida e'tirof etildi.