«Ipsvich Taun» Xulio Ensisoni 30 mln evrodan ortiq mablag'ga sotib oldi

 17 AVGUST, 2026, 15:36

«Ipsvich Taun» «Strasbur»ning hujumkor yarim himoyachisi Xulio Ensisoni doimiy asosda o'z safiga qo'shib oldi.

22 yoshli futbolchining transfer paketi bonuslar bilan birga 30 mln evrodan oshadi. Kelishuvga Ensisoning keyingi transferidan «Strasbur»ga ulush ajratish bandi ham kiritilgan.

Paragvaylik futbolchi tibbiy ko'rikdan muvaffaqiyatli o'tdi va «Ipsvich» bilan 2031 yilning yoziga qadar mo'ljallangan besh yillik shartnoma imzoladi.

Ensiso uchun «Portman Roud» begona emas. U 2024/25 yilgi mavsumning ikkinchi yarmini «Brayton»dan ijaraga olingan holda «Ipsvich»da o'tkazgan. Futbolchi o'sha davrda 13 ta uchrashuvda maydonga tushib, 2 ta gol urgan va 3 ta golli uzatmani amalga oshirgan.

Keyinchalik «Strasbur»ga ko'chib o'tgan Ensiso Frantsiya klubi safida barcha musobaqalarda 42 ta o'yin o'tkazib, 12 ta gol urdi. U asosiy pozitsiyasi — hujumkor yarim himoyadan tashqari, chap qanot va markaziy hujumda ham harakat qila oladi.

«Ipsvich» Ensiso bilan cheklanib qolmoqchi emas. Angliya klubi «Strasbur»ning yana bir futbolchisi Abdul Uattara transferini ham yakunlash arafasida. 20 yoshli Kot-d’Ivuar futbolchisining ham «Ipsvich» bilan uzoq muddatli shartnoma imzolashi kutilmoqda.