«Real»ning yozgi transferlari qanchaga tushdi?
17 AVGUST, 2026, 14:48
Joze Mourino boshqaruviga qaytgan «Real Madrid» yozgi transferlar oynasida tarkibni jiddiy yangiladi. Madridliklar hozirga qadar olti nafar yangi futbolchini jalb qilib, transfer tovonlarining o'ziga taxminan 225 mln evro sarfladi.
Klubning eng qimmat xaridi «Leyptsig»dan olingan Yan Diomande bo'ldi. 19 yoshli Kot-d’Ivuar vingeri uchun 125 mln evro to'langan. Bonuslar ishga tushsa, kelishuv qiymati 140 mln evrogacha etishi mumkin. Futbolchi bilan 2033 yilgacha shartnoma tuzilgan.
Shuningdek, «Real» Mark Kukurelyani 55 mln, Karlos Espini 25 mln va Denzel Dyumfrisni 20 mln evro evaziga o'z safiga qo'shib oldi. Bernardu Silva va Ibraima Konate esa avvalgi klublari bilan shartnomasi yakunlanganidan keyin erkin agent sifatida Madridga ko'chib o'tdi.
«Real Madrid»ning yozgi transferlari:
Yan Diomande — 125 mln evro; Mark Kukurelya — 55 mln evro; Karlos Espi — 25 mln evro; Denzel Dyumfris — 20 mln evro; Bernardu Silva — erkin agent; Ibraima Konate — erkin agent.Shu tariqa, to'rt futbolchi uchun to'langan transfer tovonlarining umumiy miqdori 225 mln evroga etdi. Biroq bu hisobga bonuslar, agentlik haqlari va erkin agentlarga to'lanadigan imzo pullari kiritilmagan. Shu sababli klubning amaldagi xarajatlari bundan yuqori bo'lishi mumkin.
Mourino yangi mavsum oldidan asosan himoya chizig'ini kuchaytirdi. Kukurelya, Dyumfris va Konate orqali mudofaaning uchta pozitsiyasiga yangi futbolchilar jalb etildi. Bernardu Silva yarim himoyada tajriba va ijodkorlikni oshirishi, Diomande esa hujum qanotida raqobatni kuchaytirishi kutilmoqda.
