Rasman: «Real» tarbiyalanuvchisini 10 mln evroga sotdi

 17 AVGUST, 2026, 14:42

«Real» hujumchisi Xakobo Ortega faoliyatini Frantsiyaning «Strasbur» klubida davom ettiradi. Bu haqda frantsuz klubi matbuot xizmati rasman ma'lum qildi.

20 yoshli ispaniyalik futbolchi «Strasbur» bilan 2031 yil yoziga qadar mo'ljallangan shartnoma imzoladi. Transfermarkt portali ma'lumotiga ko'ra, transfer qiymati 10 mln evroni tashkil etgan.

Ispaniya OAV qayd etishicha, ushbu kelishuv «Real» uchun o'zi tarbiyalagan, ammo asosiy jamoada birorta ham rasmiy o'yin o'tkazmagan futbolchining rekord darajadagi sotuvi bo'ldi.

Ortega «Real»ning ikkinchi jamoasi safida 18 ta uchrashuvda maydonga tushib, 6 ta gol urgan.