Arteta: "Biz yana Premer-ligada g'olib bo'lishni istaymiz"

 17 AVGUST, 2026, 11:00

Londonning "Arsenal" klubi bosh murabbiyi Mikel Arteta jamoaning Angliya Premer-ligasidagi chempionlik unvonini himoya qilish maqsadi haqida fikr bildirdi.

"Kanonirlar" yangi mavsumda ham chempionlik uchun asosiy favoritlardan biri sifatida qaralmoqda. O'tgan mavsumda londonliklar 22 yillik tanaffusdan so'ng ilk bor Angliya chempioni bo'lishgan edi.

"Biz yana chempionatda g'olib chiqishni istaymiz. Bu istak hech qaerga yo'qolgani yo'q — bu hisni yana bir bor tuyishni, yanada buyuk lahzalarni boshdan kechirishni xohlaymiz. Buning qanchalik qiyin ekanini va maqsadga erishish uchun qanchalik ko'p mehnat qilish kerakligini yaxshi bilamiz.

"Arsenal" hali hech qachon Premer-ligada ketma-ket ikki marta chempion bo'lmagan. Shuning uchun buning uchun, albatta, o'ziga xos bir narsa talab qilinadi. Ammo biz bunga tayyormiz", — deya Artetaning so'zlarini Arsenal Radar keltiradi.

Yakshanba kuni "Arsenal" Angliya Superkubogini qo'lga kiritdi. Mikel Arteta shogirdlari hal qiluvchi bahsda "Manchester Siti"ni 3:0 hisobida mag'lub etdi.