JCh-2026. Shveytsariya Jazoirni mag'lub etib, keyingi bosqichga yo'l oldi

 3 IYUL, 2026, 10:34

JCh-2026 musobaqasining 1/16 final bosqichidan o'rin olgan navbatdagi uchrashuv o'z nihoyasiga etdi. Kanadaning Vankuver shahridagi “BC Place” stadionida bo'lib o'tgan mazkur o'yinda Shveytsariya hamda Jazoir milliy jamoalari o'zaro kuch sinashdi va unda evropaliklar ishonchli g'alabani qo'lga kiritdi.

O'yinning dastlabki daqiqalarida afrikaliklar bir oz faollik ko'rsatib, ketma-ket hujumlar tashkil etdi. Biroq hisobni evropaliklar ochdi — 10-daqiqadayoq Bril Embolo raqib darvozasini ishg'ol qilib, jamoasini oldinga olib chiqdi. Birinchi bo'lim oxirlariga kelib Jazoir yana oldinga tashlandi, ammo hisob o'zgarmadi.

Ikkinchi taym Jazoir uchun kutilmagan zarba bilan boshlandi. Bo'limning ilk daqiqasidayoq (46-daqiqa) Dan Ndoye Shveytsariyaning ikkinchi goliga mualliflik qildi va oradagi farqni yanada oshirdi. O'yinning so'nggi qismiga kelib Shveytsariya ustunlikni to'liq o'z qo'liga oldi va raqib darvozasi oldida juda katta bosim uyushtirdi. Afrikaliklar esa so'nggi daqiqalarda deyarli hech qanday xavfli hujum tashkil eta olmadi. Natijada ushbu hisob boshqa o'zgarmadi va Shveytsariya muhim g'alabani qo'lga kiritib, keyingi bosqichga yo'l oldi. Jazoir esa 1/16 final bosqichida musobaqa bilan xayrlashdi.

Shveytsariya musobaqaning chorak final yo'llanmasi uchun Kolumbiya hamda Gana milliy jamoalari o'rtasidagi o'yin g'olibiga qarshi maydonga tushadi. Mazkur uchrashuv 8 iyul kuni bo'lib o'tishi belgilangan.

Jahon chempionati. 1/16 final
Shveytsariya — Jazoir 2:0
Gollar: 1:0 — Bril Embolo (10), 2:0 — Dan Ndoye (46).

Manba: stadion.uz