Germaniya terma jamoasi Jahon chempionatlarida gol urish bo'yicha rekord o'rnatdi

 15 IYUN, 2026, 08:06

Germaniya terma jamoasi 2026 yilgi Jahon chempionati guruh bosqichi 1-turidan o'rin olgan uchrashuvda Kyurasaoni tor-mor etdi.

Bahs 14 iyun kuni AQShning Xyuston shahridagi «NRG Stadium» stadionida bo'lib o'tdi va nemislarning 7:1 hisobidagi g'alabasi bilan yakunlandi.

Germaniya terma jamoasi Jahon chempionati final bosqichlarida kiritilgan gollar soni bo'yicha Braziliya terma jamoasidan o'zib ketib, mutlaq rekordchiga aylandi — 239 ga qarshi 238 ta gol.

JCh-2026 guruh bosqichining ikkinchi turida Germaniya 20 iyun kuni Kot-d'Ivuarga qarshi maydonga tushsa, uchinchi turda, 25 iyun kuni Ekvador bilan kuch sinashadi. Futbol bo'yicha Jahon chempionati AQSh, Kanada va Meksika mamlakatlarida bo'lib o'tmoqda va 19 iyul kuni yakuniga etadi.