Makarska Open. Mariya Timofeeva 1/2 finalda!

 6 IYUN, 2026, 18:00

Xorvatiyaning Makarska shahrida tennis bo'yicha WTA 125 toifasiga kiruvchi "CHellenjer" turniri bo'lib o'tmoqda.

Mukofot jamg'armasi 115 000 AQSH dollarini tashkil etuvchi ushbu musobaqada O'zbekistonning ikkinchi raketkasi Mariya Timofeeva ham muvaffaqiyatli odimlamoqda. Turnirda ettinchi raqam ostida tasniflangan vakilamiz yarim final yo'llanmasini qo'lga kiritdi. 

Mariya 1/4 finalda WTA reytingining 297-pog'onasidan joy olgan Yasmin Kabbayga qarshi kortga chiqdi. Bir soatu 42 daqiqa davom etgan bahsda Timofeeva raqibasini 7/5, 6/1 hisobida mag'lubiyatga uchratdi. Ikkala tennischi ham uchrashuv davomida eys zarbasini amalga oshira bilmadi. Qo'shxatolar vakilamizda ko'proq bo'ldi - 4 ga 1. Bu tennischilarning o'zaro o'tkazgan ilk uchrashuvi bo'ldi.

Taqqoslash uchun, Mariya Timofeeva ayni paytda WTA reytingida 118-o'rinni egallab turibdi. Bugun tennischimiz final chiptasi uchun ispaniyalik Sara Sorribes Tormoga qarshi bahs olib boradi. Sara reytingda 304-pog'onadan joy olgan. Uchrashuv bizning vaqt bilan soat 20:00da boshlanadi. 

Manba: olamsport.com