Amaldagi Olimpiada chempionlari kambek qilgan 6-turda asosiy raqiblarimiz qanday natija qayd etishdi? (+FOTO)
17 SENTYABR, 2024, 10:48
SHu kunlarda Vengriya poytaxti Budapesht shahri Butunjahon shaxmat Olimpiadasiga mezbonlik qilmoqda.Amaldagi Olimpiada chempioni hisoblangan O'zbekiston erkaklar terma jamoasi 6-turda Isroil shaxmatchilaridan 2,5:1,5 hisobida ustun kelishdi. Yosh grossmeysterlarimiz 45-Butunjahon shaxmat Olimpiadasining ertaga o'tkaziladigan 7-turida tarkibida tajribali shaxmatchilar jam bo'lgan Ukraina terma jamoasiga qarshi dona surishadi.
Ettinchi tur oldidan 100 foizlik natija qayd etgan birgina Hindiston qoldi. Hindlar 6 ta uchrashuvnig barchasida g'alaba qozonishgan. Vetnam, Xitoy va Eron terma jamoalari hisobida 5 g'alaba va 1 durang bor. Angliya va Gruziya ham hali yutqazmagan. O'zbekiston, Franciya, Ukraina, Armaniston, Vengriya, Serbiya, Litva va Niderlandiya terma jamoalari 5 g'alaba va 1 mag'lubiyat qayd etishgan. O'zbekiston qo'shimcha ko'rsatkichlarga ko'ra 10 ochko jamg'arganlar orasida eng yuqori - 5-o'rinni egallab turibdi.
Terma jamoamizning asosiy raqiblari 6-turda muhim g'alabalarga erishishdi. Faqat Xitoy - Vetnam va AQSH - Ruminiya uchrashuvlarida tomonlar 2:2 hisobidagi jangovar durangga imzo chekishdi. Hindiston Olimpiada mezbonlarini 3:1 hisobida engishdi. Eron Magnus Karlsen boshchiligidagi Norvegiya terma jamoasini taslim etdi - 2,5:1,5. Ozarbayjon biroz kutilmaganda Litvaga 1,5:2,5 hisobida yutqazib qo'ydi.
Ertaga o'tkaziladigan 7-turning markaziy bahsi Hindiston va Xitoy terma jamoalari o'rtasida tashkil etiladi.
7-turning markaziy uchrashuvlari:
Litva - Vengriya
Eron - Vetnam
O'ZBEKISTON - Ukraina
Serbiya - Niderlandiya
Armasniton - Angliya
Franciya - Gruziya
Manba: olamsport.com
