logotip
Assalom-u alaykum, Mehmon!
Soat: 16:39
KirishA'zo bo'lish
TAVSIYA QILAMIZ:
Real Madrid Fans Uzbekistan
Chiroyli.com - Tezkor yangiliklar
Har safargisidan ham qiziqroq A Seriya. Start oldidan italyan grandlarining potentsiali qay ko'rinishda?

 21 AVGUST, 20:35 118

.

A Ceriyaning o'tgan mavsumi, tarixiy voqelik sifatida ko'pchilikning yodida qolib ketdi.

«Inter» «Yuventus»ning uzoq davom etgan gegemoniyasini buzib, 11 yil deganda mamlakat chempioni nomini o'zgartirdi. «Milan» uzoq yillik tanaffusdan so'ng nihoyat Chempionlar Ligasiga qaytdi. «Atalanta» ikkinchi mavsumdirki, o'zining etuk o'yini va top-klub maqomini tasdiqlamoqda. Italiya chempionatining bugun boshlanadigan yangi mavsumi yanada qiziqarli va hayajonli voqealarni muxlislarga va'da qilishi tayin. Stadionlarga ham tomoshabinlar qaytishni boshlagan. 

Stadion.uz esa Skudetto uchun asosiy da'vogar jamoalarning imkoniyatlari xususida fikr almashadi. 

Liderisiz qolgan «Inter»

Mamlakatning amaldagi chempioni o'z kubogini bu safar himoya qilishi ancha qiyin bo'ladi deya taxmin qilinmoqda. Yozda «Inter» o'zining eng yaxshi ishongan tog'lari - Romelu Lukaku va Ashraf Hakimilarni qo'yib yubordi. Bu erda rahbariyat qo'ygan talabga qarshi chiqishning iloji bo'lmadi. Og'ir moliyaviy ahvol sababli jamoa yuqoridagi futbolchilarini sotishga majbur bo'ldi. Ulardan oldinroq Kontega ham iste'fo berildi. Uzoq yillik tanaffusdan so'ng jamoaga chempionlikni taqdim etgan murabbiy uchun bu albatta hurmatsizlik belgisini bildirardi. Klub rahbarlarining fikricha, yutib berilgan kubok qaytaga bosh staffga qimmatga tushib ketgan. Naqadar mantiqsiz holat!

Ko'rinib turibdiki, bu «neradzurrilar»ning amalga oshirgan majburiy chorasi edi, lekin rahbarlar bu futbolchilarga hech bo'lmaganda munosib o'rinbosar ham topa olishmadi. Hakimi o'rniga «qora-ko'klar» PSVdan Denzel Dyumfrisni 12,5 million evroga sotib olishdi. Gollandiyalik futbolchi o'z chempionatida o'zini yaxshi tomonlama ko'rsatgandi, ammo uning A Seriyada qanday o'ynashi haligacha so'roq ostida turibdi. Xo'sh, 35 yoshli Edin Jeko qanday formada? Ko'pyillik tajribasiga qaramasdan u baribir Lukakuga haqiqiy o'rinbosar bo'la olmaydi. Shu ma'noda ham «Inter»ni yaqqol lidersiz qolgan jamoa sifatida ta'riflasak bo'ladi. Simone Indzagining «Latsio»dagi ishonchli o'yini endi «Inter»da Skudettoni yutishga etarmikan?

«Yuventus» Skudetto poygasiga qaytmoqda

Bunday deyishimizga sabab mavsum sari ahvoli yomonlashib borayotgan «zebralar» boshiga jamoaning tajribali va o'ziga qadrdon murabbiyi Allegri qaytganligida. O'tgan mavsum «Yuventus» va rahbariyat uchun anchayin halokatli yakunlandi. «Byankonerilar» yuqorida ta'kidlaganimiz, ketma-ket to'qqiz mavsumlik gigamoniyasidan so'ng g'oliblikni «Inter»ga boy berib qo'yishdi. Chempionlar Ligasida esa doimgidek ilk bosqichlardanoq qoqildi. Bu safar Allegri bilan endi «keksa sinyora»ning chempionlik uchun imkoniyatlari sezilarli darajada oshishi tabiiy hol.

Qolaversa, «Yuventus» transferlar bozorida juda yaxshi ishlayapti. «Byankonerilar» umidli hujumchi Kayo Xorxe bilan shartnoma imzoladi, «Shalke»dan umidli Ueston Makkennini sotib oldi va «Sassuolo»dan esa Manuel Lokatelli ijaraga olindi. Bular albatta «Yuventus»ning A Seriya g'olibligi uchun imkoniyatlarini keskin oshirsa ajab emas.

Mourinoning qaytishi

Joze Mourinoning «Roma» bosh postiga tayinlanishi A Seriyaning mavsumlararo eng katta yangiliklaridan biri bo'ldi desak yangilishmaymiz. Portugaliyalik mutaxassisning bu erga qaytishi chempionatga bo'lgan qiziqishni yanada oshirgani rost. Mour A Seriyada g'oliblikni qo'lga kiritgan. Ammo bu voqea sodir bo'lganiga 10 yildan oshib ketdi. Rim klubiga tayinlanish, u uchun bir tomondan qiyinchilik, ikkinchi tomondan esa tanqidchilarga o'zining top murabbiy bo'lib qolaverishini isbotlashiga so'nggi imkoniyat.

«Bo'rilar» Mourino boshchiligida o'zini qanday ko'rsatishi esa barchaga birdek qiziq. Jamoaning Konferentsiyalar ligasiga katta mas'uliyat bilan yondashishlari dargumon. «Roma»ning asosiy maqsadi albatta, kelasi mavsum uchun Chempionlar Ligasiga yo'llanmani qo'lga kiritish bo'ladi. Albatta, portugaliyalikning kelishi rimliklar uchun muntazam ommaviy axborot vositalari nishonida bo'lishini ta'minlaydi, biroq shu o'rinda natijalarni ham unutmaslik kerak.

«Milan»ning ambitsiyalari

O'tgan mavsumda «Milan» A Ceriyada 2-o'rinni egalladi va bu jamoa uchun katta muvaffaqiyat sifatida e'tirof etildi. «Rossonerilar» uzoq vaqtdan beri birinchi marta Chempionlar Ligasi guruh bosqichiga yo'llanmani qo'lga kiritishdi, lekin murabbiy va futbolchilar bu bilan cheklanib qolmoqchi emaslar. Endi «qizil-qoralar» ikki frontda ham teng darajada kurashishlariga to'g'ri keladi. Kelgusi mavsumda Stefano Pioli shogirdlari bu borada jiddiy sinovdan o'tsalar ajab emas. Ammo «Milan» tarixiy jihatdan o'z ambitsiyalariga ega bo'lgan jamoa.

Klub doimiy ravishda tarkibni kuchaytirish ustida ishlab keladi. «Rossonerilar» transferlar oynasida ancha faol bo'ldi. Klub Liga 1ning eng yaxshi darvozabonlaridan biri Mayk Menyan bilan shartnoma imzoladi. Shuningdek, Olive Jiru kabi hujumchi ham jamoaga qo'shib olindi. «Qizil-qoralar» o'z navbatdagi Fikayo Tomori va Braim Diaz kabi muhim o'yinchilarni jamoada saqlab qolishga erishdi. Shu va boshqa jihatlarni-da olib qaralsa, «Milan» o'sishda davom etmoqda va har qanday holatda ham chempionlik uchun asosiy da'vogarlardan biri bo'lib qoladi.

«Napoli»ning umidlari bu safar ham puch yong'oqqa aylanadimi?

O'tgan yilgi mavsumda «Napoli»ga Chempionlar Ligasiga chiqish uchun birgina ochko etishmadi xolos. 2019/20 yilgi mavsumda neapolliklar A Seriya turnir jadvalida 7-o'rinni egallagan edilar. «Adzurri» prezidenti Aurelio De Laurentis kelasi mavsumdan boshlab jamoadan umidlari katta ekanligini aytgandi. Lekin maqsadlarga erishish uchun 2 yildan beri mashg'ulot o'tkazmagan Luchiano Spalettining tayinlanishi bizga ancha mantiqsiz holatdek tuyulmoqda. De Laurentisning o'zi mavsum boshlanishidan oldin jamoada ba'zi muammolar borligini ochiqchasiga tan oldi. «Napoli» transferlar oynasida o'zining ikki himoyachisi va bir yarim himoyachisini yo'qotdi.

Xaridlar borasida esa birgina «Inter»dan qanot himoyachisi Matteo Politano sotib olindi. Bundan tashqari, darvozabon David Ospina, hujumchi Dris Mertens va jamoa sardori Lorenso Insinelar bilan shartnomalar uzaytirildi. Neapolliklarga har doim chempionlik yo'lida nimadir to'sqinlik qilib qoladi. Yangi mavsumda esa qanday bo'ladi - buni vaqt ko'rsatadi.

Sarrining «Latsio»dagi yurishi - sirli jamoa

Sarrining «Latsio»ga tayinlanishiga biroz kutilmagan hol sifatida qaraldi. Mutaxassisning oldin «Yuventus» va «Chelsi» kabi klublarni boshqarganini hisobga olsak, bu biroz kutilmagan qaror bo'ldi. Har doim italiyalik murabbiy o'z jamoasiga moslashib olish uchun 1 mavsumni qurbon qilardi. Murabbiyga vaqt berilishi mayli, kutilar, lekin futbolchilarning saviyasi uning talablariga javob bera olarmikin, bu boshqa masala.

Sarrining «Chelsi»ni tark etishida unga «ko'k»larning yangi futbolchilar bilan shartnoma imzolay olmagani sabab bo'lgandi. Rimda mutaxassisning jamoani kuchaytirishi uchun rahbariyat ko'p pul sarflay olmaydi. «Burgutlar»ning tarkibi esa ancha eski. Eng asosiysi, yangi murabbiyning uslubi futbolchilar avvalroq o'rganganlari - Indzagining o'yinidan butunlay farq qiladi. Umuman olganda, «Latsio» mavsum oldidan katta jumboqli jamoa bo'lib qolyapti. Ammo boshqa tomondan Sarri ishlagan jamoalar doim barchaga qiziq bo'lgan.

Yusufbek Saydaliev tayyorladi

Manba: stadion.uz

Yangiliklarni Telegramda o'qing!
BILDIRILGAN FIKRLAR
QIZIQARLI FAKT VA IQTIBOSLAR