"Bavariya" Manuel Noyerning jarohat olganini e'lon qildi

 17 MAY, 2026, 16:54

"Bavariya" jamoasining afsonaviy va tajribali posboni Manuel Noyer kutilmaganda jarohat oldi. Myunxen klubi matbuot xizmati tarqatgan rasmiy bayonotga ko'ra, darvozabonning chap oyoq boldir mushaklarida muammo yuzaga kelgan.

Eslatib o'tamiz, Bundesliga doirasida "Kyoln"ga qarshi kechgan va myunxenliklarning 5:1 hisobidagi yirik g'alabasi bilan yakunlangan bahsda Noyer asosiy tarkibda maydonga tushgan edi. Biroq u uchrashuvni oxirigacha etkazib qo'ya olmadi va og'riq sabab 60-daqiqada zaxiraga olindi. Hozircha Noyerning qachon safga qaytashi borasida aniq muddatlar ochiqlanmagan.

Qizig'i shundaki, bundan bir necha kun oldingina 39 yoshli darvozabon "Bavariya" bilan amaldagi shartnomasini yana bir mavsumga — 2027 yilning yoziga qadar uzaytirgan edi. Shuningdek, matbuotda Noyer tez orada start oladigan JCh-2026 musobaqasi uchun Germaniya terma jamoasiga chaqirilishi haqida xabarlar paydo bo'lgandi.