Xoland to'purarlar poygasida ta'qibchisidan uzoqlashdi (Video)

 9 MAY, 2026, 23:18

Angliya Premer-ligasining 36-turi doirasida «Manchester Siti» o'z maydonida «Brentford»ni qabul qilmoqda. Uchrashuvning 75-daqiqasida «shaharliklar» o'z ustunligini mustahkamlashga erishishdi.

Jamoaning to'purar hujumchisi Erling Xoland yaqin masofadan raqib darvozasini ishg'ol etib, hisobni 2:0 ko'rinishiga keltirdi. Ushbu gol norvegiyalik futbolchi uchun joriy mavsumdagi 26-gol bo'ldi.

Shu tariqa, Xoland APL to'purarlar poygasidagi etakchiligini yanada mustahkamlab oldi. Diqqatga sazovor jihati shundaki, ayni damda to'purarlar ro'yxatida ikkinchi o'rinda borayotgan Igor Tyago aynan «Brentford» sharafini himoya qiladi. Braziliyalik hujumchi hisobida hozircha 22 ta gol mavjud.