Rasman. «Yuventus» jamoa sardori Manuel Lokatelli bilan shartnomani uzaytirdi

 17 APREL, 2026, 23:06

Turinning «Yuventus» klubi yarim himoyachi va jamoa sardori Manuel Lokatelli bilan shartnomani 2030 yil yozigacha uzaytirdi.

«Barchamiz eslaymiz, Manuel 2021 yilda klubga kelganida katta hayajon bilan doim «Yuventus» muxlisi bo'lganini aytgan edi. Shuning uchun u bilan shartnomani uzaytirish — uning maydondagi o'sib borayotgan etakchilik va klub ruhiga mos keladigan kurashchanlik xususiyatining tabiiy davomidir. Bu — sport loyihamizni barqaror rivojlantirish va kelajakda jamoani yanada raqobatbardosh qilish yo'lidagi navbatdagi qadam», — dedi turinliklar bosh direktori Damen Komolli klub rasmiy saytiga bergan intervyusida.

Manuel Lokatelli shu vaqtgacha «Yuventus» safida barcha musobaqalarda 224 ta o'yinda ishtirok etib, 9 ta gol va 17 ta golli uzatma muallifi bo'lgan.