10 yil avval chempionlik uchun kurashgan «Lester» va «Tottenxem»ning biri Chempionshipda, ikkinchisi APLda jon saqlashga urinmoqda

 13 APREL, 2026, 11:24

«Lester» va «Tottenxem» joriy mavsum yakunlariga ko'ra quyi ligaga tushib ketish xavfi ostida qolmoqda.

«Tulkilar» Chempionship turnir jadvalida oxirgidan bitta oldingi — 23-o'rinni egallab turibdi, vaholanki mavsum tugashiga atigi to'rtta tur qoldi. «Shporlar» esa Premer-ligada 18-o'rinda bormoqda. Qizig'i shundaki, atigi o'n yil avval bu jamoalar APL chempionligi uchun kurashgan edi: o'shanda «Lester» sensatsion tarzda birinchi, «Tottenxem» esa uchinchi o'rinni egallagan.

«Lester»ni ligada jon saqlab qolish imkonini beruvchi 21-o'rindan to'rt ochko ajratib turibdi. Ta'kidlash joizki, klub moliyaviy qoidalarni buzgani uchun olti ochkodan mahrum qilingan edi. «Tottenxem» esa 17-o'rindagi «Vest Xem»dan ikki ochko ortda qolmoqda.