Skoulz: "Italiya terma jamoalar orasidagi "Arsenal"

 2 APREL, 2026, 18:12

«Manchester Yunayted» klubining sobiq yarim himoyachisi Pol Skoulz qatorasiga uchinchi bor Jahon chempionatiga chiqa olmagan Italiya terma jamoasi haqida o'z fikrlarini bildirdi.

«Italiya terma jamoalar orasidagi «Arsenal»ga o'xshab qolgan. Bu jamoaning ishtiyoqi hamon o'tmishdagi shonli xotiralarga tayanadi. Italiya jamoasida aniq yo'nalish etishmayapti, u yagona tizim sifatida ishlamayapti. Hamma narsa individual harakatlarga bog'lanib qolgan, umumiy o'yin esa juda sust ko'rinmoqda», — dedi Skoulz Corriere dello Sport nashriga bergan intervyusida.

«Bu biz 90-yillar yoki 2000-yillar boshidan eslaydigan o'sha Italiya emas. Paolo Maldini, Fabio Kannavaro, Andrea Pirlo, Franchesko Totti yoki Janluidji Buffon kabi afsonalardagi ehtirosdan asar ham qolmagan», — deya qo'shimcha qildi Skoulz.

Eslatib o'tamiz, Italiya Jahon chempionatiga chiqish uchun kechgan hal qiluvchi bahsda Bosniya va Gertsegovina terma jamoasiga penaltilar seriyasida imkoniyatni boy berdi.