Dani Sebalosga narx belgilandi

 2 APREL, 2026, 12:12

Madridning «Real» klubi yarim himoyachisi Dani Sebalos yozgi transfer oynasida sotib yuborilishi mumkin.

Ispaniyalik futbolchi joriy mavsum yakunlanganidan keyin jamoadan ketishga tayyor — u o'zi uchun qadrdon bo'lgan «Betis» klubiga qaytishni afzal ko'rmoqda, deya xabar beradi Diario AS nashri. «Qaymoqranglilar» tomonidan belgilangan narx seviliyaliklar uchun muammo tug'dirishi mumkin: «Real» 29 yoshli futbolchi uchun 15 mln evro talab qilmoqda, vaholanki uning shartnomasi kelasi yili o'z nihoyasiga etadi.

Transfermarkt portalida Dani Sebalosning bozor qiymati 8 mln evro deb ko'rsatilgan. Joriy mavsumda yarim himoyachi Madrid grandi safida 22 ta o'yinda ishtirok etdi, biroq samarali harakatlar bilan ajralib turmadi. Futbolchi jarohati sababli fevral oyidan beri maydonga tushmayapti.