O'rtoqlik o'yini. Niderlandiya terma jamoasi kambek amalga oshirib, Norvegiyani mag'lub etdi

 28 MART, 2026, 07:42

Niderlandiya va Norvegiya terma jamoalari o'rtasida o'rtoqlik uchrashuvi bo'lib o'tdi. Amsterdam shahridagi «Yoxan Kroyff Arena» stadionida o'tgan bahsni belgiyalik hakam Lourens Visser boshqardi. Uchrashuv mezbonlarning 2:1 hisobidagi g'alabasi bilan yakunlandi.

Birinchi bo'lim o'rtalarida mehmonlar hujumchisi Andreas Shelderup hisobni ochdi. 35-daqiqada Niderlandiya himoyachisi Virjil van Deyk muvozanatni tikladi. 51-daqiqada esa yarim himoyachi Teyani Reynders Niderlandiyani oldinga olib chiqdi.

Har ikki jamoa ham 2026 yilda AQSh, Kanada va Meksikada bo'lib o'tadigan jahon chempionatida ishtirok etadi. Niderlandiya terma jamoasi F guruhida Yaponiya, Tunis va Evropa saralashining B yo'li g'olibi bilan o'ynaydi. Norvegiya esa "I" guruhida Frantsiya, Senegal va qit'alararo pley-offning 2-yo'li g'olibi bilan bahs olib boradi.

O'rtoqlik uchrashuvi
27 mart 2026 yil, juma.
Niderlandiya — Norvegiya - 2:1
Gollar: 0:1 — Shelderup (24), 1:1 — van Deyk (35), 2:1 — Reynders (51)