«Nyukasl» asosiy himoyachisi jarrohlik amaliyotini o'tkazdi

 24 MART, 2026, 12:36

«Nyukasl» safida to'p tepayotgan 26 yoshli himoyachi Sven Botman yuz suyagidagi jarohat tufayli jarrohlik amaliyotini o'tkazdi. Bu haqda klub matbuot xizmati ma'lum qildi.

Niderlandiyalik futbolchining safga qaytish muddati hozircha ochiqlanmagan. U Premer-liganing 31-turi doirasida «Sanderlend»ga qarshi kechgan bahsda (1:2) jarohat olgan edi.

Joriy mavsumda Botman «qarg'alar» libosida 31 ta uchrashuvda maydonga tushib, o'z hisobiga 2 ta gol va bitta golli uzatmani yozdirib qo'ydi.

Bugungi holatga ko'ra, Eddi Xau shogirdlari 42 ochko bilan Premer-liga turnir jadvalining 12-pog'onasini egallab turibdi.