"Real" argument topdi va Valverdening chetlatilishiga apellyatsiya beradi

 23 MART, 2026, 18:54

«Real» yarim himoyachisi Federiko Valverde «Atletiko»ga qarshi kechgan derbida (3:2) maydondan chetlatilgan edi. Urugvaylik futbolchi Aleks Baenaning oyoqlariga zarba bergani uchun o'qizil kartochka oldi.

Marca nashrining xabar berishicha, «Real» Valverdening chetlatilishi yuzasidan apellyatsiya beradi. Madridliklarning argumenti shundan iboratki, agar ushbu vaziyatda Valverde emas, balki boshqa futbolchi ishtirok etganida, qizil kartochka ko'rsatilmagan bo'lardi. «Qaymoqranglilar»ning fikricha, Federikoning maydondan haydalishi uning Baena bilan bo'lgan eski mojarosiga bog'liq.

Bir necha yil oldin o'yindan so'ng Valverde Baenani to'xtash joyida (parkovkada) kutib turib, unga zarba bergan edi. Federiko bu ishni raqibining maydonda uning oilasi sha'niga aytgan so'zlari tufayli amalga oshirgan. O'shanda bu voqea haqida OAVda keng yozilgan edi.