«Nyukasl» «Chelsi»ning omadsiz transferini o'z safiga qo'shib olmoqchi
21 MART, 2026, 13:24
«Chelsi» hujumchisi Liam Delap joriy mavsum yakunlanganidan keyin Angliya premer-ligasining boshqa bir klubiga ko'chib o'tishi mumkin.
23 yoshli futbolchi uchun London klubidagi debyut mavsumi u qadar muvaffaqiyatli kechmayapti: u asosiy tarkibda kam maydonga tushmoqda va bor-yo'g'i ikkita gol urdi. Jurnalist Ben Jeykobsning ma'lumotiga ko'ra, «Nyukasl» yozgi transfer oynasida Delapni sotib olish imkoniyatini jiddiy ko'rib chiqmoqda. Potentsial xaridorlar hujumchining «Chelsi»dagi holatini hisobga olsa, uni o'z tomonlariga og'dirib olish to'laqonli real ekaniga ishonishmoqda.
Liam Delap o'tgan yilning iyun oyida «Ipsvich»dan 35,5 mln evro evaziga «ko'klar» safiga kelib qo'shilgan edi. Futbolchining shartnomasi 2031 yilning o'rtalarigacha mo'ljallangan.
