Maks Douman APL tarixidagi eng yosh gol muallifiga aylandi

 15 MART, 2026, 12:30

Londonning «Arsenal» klubi 16 yoshli futbolchisi Maks Douman «Everton»ga qarshi o'yinda gol urib, rekordni yangiladi. Vinger Premer-liga butun tarixidagi eng yosh gol muallifiga aylandi — u 16 yoshu 73 kunligida raqib darvozasini ishg'ol qilishga muvaffaq bo'ldi. «Kanonirlar» vunderkindi kattalar futbolidagi debyut golini shanba kuni APLning 30-turi doirasida kechgan bahsning 97-daqiqasida kiritib, o'yinning yakuniy natijasini (2:0) belgilab berdi.

Ushbu bahs Maks Douman uchun «Arsenal» asosiy jamoasi safida barcha turnirlar doirasidagi ettinchi o'yin bo'ldi. Bungacha futbolchi bitta golli uzatmani amalga oshirishga ulgurgan edi.

Mikel Arteta jamoasi 70 ochko jamg'argan holda turnir jadvalida peshqadamlik qilmoqda.