Maykl Kerrikning kelajagi mavsum yakunida hal bo'ladi

 9 MART, 2026, 13:36

Joriy mavsum yakunlanganidan so'ng «Manchester Yunayted»da yana murabbiy almashishi mumkin.

Klub rahbariyati bosh murabbiy vazifasini vaqtincha bajaruvchi Maykl Kerrikning ishidan mamnun. «Manchester Yunayted» mutasaddilari ingliz mutaxassisiga bildirilgan ishonch o'zini to'liq oqladi, deb hisoblashmoqda, biroq uning kelajagi borasida hali yakuniy qaror qabul qilinmagan. Bu haqda The Athletic nashri xabar bermoqda.

Yakuniy tanlov mavsum tugaganidan keyin amalga oshiriladi. Jamoaning doimiy murabbiyi sifatida Ruben Amorimning o'rnini kim egallashi hozircha aniq emas.

Avvalroq «MYu» Roberto de Dzerbi, Karlo Anchelotti, Roberto Martines va boshqa murabbiylarga qiziqish bildirayotgani haqida xabarlar tarqalgan edi. Ayni damda mankunianliklar Premer-liga turnir jadvalida uchinchi o'rinni egallab turibdi.