Musiala: "Nega bunday bo'lganini tushunmadim"

 7 MART, 2026, 13:30

«Bavariya» yarim himoyachisi Jamal Musiala asosiy jamoada ilk bor taqqan sardorlik bog'ichi haqida o'z fikrlarini bildirdi.

«Kimmix nima uchun uni menga berganini tushunmadim. Menimcha, Leon yoshi kattaroq bo'lgani uchun bog'ichni u taqishi kerak edi. Ammo men bundan xursandman. Bunday katta klubda sardorlik bog'ichini taqish men uchun yuksak sharaf», — deya Musialaning so'zlaridan iqtibos keltirmoqda Bayern & Germany.

Germaniya chempionatining 25-turida «Bavariya» Myonxengladbaxning «Borussiya» jamoasini tor-mor etdi. Uchrashuv 4:1 hisobida yakunlandi. Musiala bahsdagi gollardan biriga mualliflik qildi.

Joriy mavsumda 23 yoshli Musiala barcha turnirlarda jami o'nta o'yinda maydonga tushib, ikkita gol va ikkita golli uzatmani o'z hisobiga yozib qo'ydi.