Turkiya Kubogi: Eldor va Abbos to'liq o'ynagan bahsda «Bashakshexir» «Trabzonspor»ga yutqazdi

 4 MART, 2026, 02:06

Turkiya Kubogining 4-bosqichi doirasida hamyurtlarimiz Eldor Shomurodov va Abbosbek Fayzullaev to'p surayotgan «Istanbul Bashakshexir» o'z maydonida «Trabzonspor»ni qabul qildi. Afsuski, istanbulliklar uchun ushbu bahs muvaffaqiyatsiz yakunlandi.

Har ikki vakilimiz — Shomurodov va Fayzullaev uchrashuvni asosiy tarkibda boshlab, final hushtagigacha maydonda harakat qilishdi. Eldor 38-daqiqada hakam tomonidan sariq kartochka bilan jazolandi. Abbos esa hujumlarni tashkil qilishda faol bo'lgan bo'lsa-da, bu jamoasini mag'lubiyatdan qutqarib qola olmadi.

O'yin gollarga boy bo'ldi va yakunda 2:4 hisobida mehmonlar g'alaba qozonishdi. Bahsning burilish nuqtasi 79-daqiqada sodir bo'ldi: «Bashakshexir» himoyachisi Usseynu Ba maydondan chetlatilgach, mezbonlar o'n kishi bo'lib qolishdi. Son jihatdan ustunlikka ega bo'lgan «Trabzonspor» qolgan daqiqalarda ikkita gol urib, masalani hal qildi.

Endilikda Eldor va Abbos jamoasi bor e'tiborini Turkiya Superligasidagi bahslarga qaratadi.