Rahim Sterling yozdayoq APLga qaytishi mumkin

 18 FEVRAL, 2026, 13:06

«Feyenoord» hujumchisi Rahim Sterling Angliya Premer-ligasiga qaytishi mumkin.

«Sports Boom» bergan ma'lumotlarga ko'ra, shu yozda «Aston Villa» va «Manchester Yunayted» hujumchini o'z safiga qo'shib olish variantini ko'rib chiqishlari mumkin. Agar Sterling Niderlandiyada muvaffaqiyatli harakat qilsa, har ikki jamoa keyingi mavsum boshlanishidan avval futbolchining transferini erkin agent sifatida rasmiylashtirishga harakat qilib ko'rishi ehtimol.

Rahim Sterling «Feyenoord» bilan 2026 yilning 30 iyunigacha shartnoma imzolagan. Hozirgi vaqtda futbolchi viza bilan bog'liq muammolar sababli Niderlandiya klubida maydonga tusha olmayapti. Shuningdek, hujumchi o'z faoliyati davomida «Liverpul», «Manchester Siti», «Chelsi» va «Arsenal» sharafini himoya qilgan. «Transfermarkt» portali Sterlingning narxini 5 million evroga baholamoqda.