Rafinya Ispaniya Kubogi yarim finali oldidan o'z holati haqida gapirdi

 10 FEVRAL, 2026, 01:06

«Barselona» vingeri Rafinya o'zining sog'lig'i borasidagi holatga to'xtalib o'tdi.

Avvalroq, hujumkor yarim himoyachining o'ng sonidagi mushaklarida zo'riqish aniqlangani xabar qilingan edi. U Ispaniya Kubogi 1/4 finali doirasidagi «Albasete»ga qarshi safar uchrashuvini (2:1) va La Ligadagi «Malorka» bilan bahsni (3:0) o'tkazib yubordi.

«O'zimni yaxshiroq his qilyapman, biz bosqichma-bosqich oldinga harakat qilyapmiz. Payshanba kunigacha tayyor bo'lamanmi-yo'qmi, ko'ramiz, kutamiz. Imkoniyatlar bor, lekin barchamiz jarohatlar qanchalik tez-tez sodir bo'lishini bilamiz. Jamoani sog'indim», — dedi Rafinya.

Eslatib o'tamiz, payshanba kuni «Barselona» Ispaniya Kubogi yarim finali doirasida safarda «Atletiko»ga qarshi maydonga tushadi.