Kivu «Inter»ning chempionlik imkoniyatlari haqida: "Hozircha — nol foiz"

 9 FEVRAL, 2026, 12:42

Milanning «Inter» klubi bosh murabbiyi Kristian Kivu A Seriyadagi chempionlik poygasi haqidagi savolga javob berdi.

Yakshanba kuni «neradzurrilar» safarda «Sassuolo»ni tor-mor etishdi (5:0) va ikkinchi o'rinda borayotgan «Milan» bilan oradagi farqni sakkiz ochkogacha etkazishdi. «Rossonerilar» ixtiyorida bitta zaxira o'yini mavjud.

Uchrashuv yakunlangach, jurnalistlar Kivudan sovrin uchun kurashdagi imkoniyatlar haqida so'rashdi — u esa ancha o'ziga xos tarzda javob qaytardi.

"Hozirgi daqiqada — nol foiz. Oldinda hali o'yinlar ko'p. Faqat bizgina katta maqsadlarni qo'yayotganimiz yo'q. Oldinda og'ir mehnat kutmoqda", — dedi ruminiyalik mutaxassis DAZN telekanaliga bergan intervyusida.

Kelgusi shanba, 14 fevral kuni, Italiya chempionatining 25-turi doirasida «Inter» o'z maydonida «Yuventus»ni qabul qiladi.