Turkiya kubogi. Shomurodov va Fayzullaev gol urgan bahsda “Bashakshehir” yirik hisobda g'alaba qozondi (videosharh)

 4 FEVRAL, 2026, 21:34

Turkiya kubogi guruh bosqichi 3-turidan o'rin olgan “Karagyumruk” hamda “Bashakshehir” o'rtasidagi bahs yakuniga etdi. 4 fevral, chorshanba kuni Istanbuldagi “Otaturk” stadionida kechgan bahsda Nuri Shahin boshchiligidagi jamoa yirik 4:1 hisobida g'alaba qozondi.

Uchrashuvdagi hisob 8-daqiqada Abbosbek Fayzullaev tomonidan ochilgan bo'lsa, 22-daqiqada Eldor Shomurodov ham gol urib hisobdagi farqni ikkitaga oshirdi. Ammo Shomurodov 26-daqiqada o'zini noqulay sezgani sabab zaxiraga olindi. Uning o'rniga Migel Krespo maydonga tushdi.

Ikkinchi bo'limning 50-daqiqasida zaxiradan o'yinga qo'shilgan Krespo hisobni yirik ko'rinishga keltirib qo'ydi. 65-daqiqada Ivan Brnich “Bashakshehir”ning 4-golini kiritdi. 79-daqiqada “Karagyumruk” hisobni bittaga qisqartirdi, ammo bu gol jamoani mag'lubiyatdan qutqarib qolmadi.

Shu tariqa, “Bashakshehir” Turkiya kubogining 3-turida yirik hisobda g'alaba qozonib, o'z hisobiga navbatdagi 3 ochko yozdirib qo'ydi. Mazkur g'alabadan keyin Nuri Shahin boshchiligdagi jamoa 6 ochko to'plagan holda “A” guruhi turnir jadvalida 3-pog'onani egallab turibdi.

“Bashakshehir” safida o'ynaydigan O'zbekiston terma jamoasining ikki nafar a'zosi ham asosiy tarkibda maydonga tushdi. Shomurodov 26-daqiqada jarohat sabab almashtirilgan bo'lsa, Abbosbek Fayzullaev 58-daqiqada zaxiraga olindi.

Turkiya kubogi, 3-tur
“Karagyumruk” — “Bashakshehir” 1:4
Gollar: 0:1 — Fayzullaev (8), 0:2 — Shomurodov (22), 0:3 — Krespo (50), 0:4 — Brnich (65), 1:4 — Kone (79)

Manba: stadion.uz