Italiya kubogi. «Komo» «Fiorentina»ni mag'lub etdi va chorak finalga yo'l oldi (videosharh)

 28 YANVAR, 2026, 08:06

2025/2026-yilgi mavsum Italiya kubogi 1/8 final bosqichi doirasida «Fiorentina» hamda «Komo» o'rtasida uchrashuv bo'lib o'tdi. Sesk Fabregas shogirdlari mazkur o'yinda 3:1 hisobida irodali g'alabaga erishdi.

Uchrashuvning 7-daqiqasida Florentsiya klubi hujumchisi Roberto Pikkoli hisobni ochdi. 20-daqiqada «Barselona»ning sobiq futbolchisi Serxi Roberto muvozanatni tikladi. 60-daqiqada argentinalik yarim himoyachi Nikolas Pas «Komo»ning ikkinchi golini urdi. 90+1-daqiqada esa ispaniyalik Alvaro Morata o'yindagi yakuniy hisobni o'rnatdi.

Shu tariqa, «Komo» Italiya kubogining 1/4 finaliga yo'l oldi, «Fiorentina» esa musobaqadagi ishtirokini yakunladi. Chorak finalda Fabregas shogirdlari «Napoli»ga qarshi maydonga tushadi.

Italiya kubogi, 1/8 final
Fiorentina (Florentsiya) — Komo (Komo) - 1:3
Gollar: 1:0 — Pikkoli (7), 1:1 — Serxi Roberto (20), 1:2 — Nikolas Pas (60), 1:3 — Alvaro Morata (90+1)