"Barselona" Alvares transferi bo'yicha qanday pozitsiyada ekanligi ma'lum bo'ldi

 17 YANVAR, 2026, 08:30

"Barselona" Madridning "Atletiko" klubi hujumchisi Xulian Alvaresga qiziqish bildirayotgani haqidagi mish-mishlar so'nggi vaqtlarda tinchib qoldi.

Mavsum startida matbuotda "ko'k-anorranglilar"ning 25 yoshli argentinalik futbolchiga qiziqishi haqida tinimsiz gap-so'zlar bo'lib turgandi. So'nggi oylarda "matraschilar" forvardi o'zini unchalik yorqin ko'rsatmayapti, biroq Kataloniya grandi hamon unga qiziqish bildirmoqda, deya xabar beradi Marca. "Barselona" Alvaresni transfer maqsadi deb hisoblamoqda, futbolchi klub rahbariyati va bosh murabbiy Xans-Diter Flikka yoqadi.

Xulian Alvaresni sotib olish oson bo'lmaydi - "Atletiko" kamida 100 mln evro so'raydi. Jahon chempionining madridliklar bilan shartnomasi 2030 yilgacha mo'ljallangan.