IFAB vaqtni ataylab cho'zishga qarshi qo'shimcha choralarni ko'rib chiqadi

 16 YANVAR, 2026, 08:42

Futbol qoidalarini ishlab chiqish va tartibga solish bilan shug'ullanuvchi Xalqaro futbol assotsiatsiyalari kengashi (IFAB) kelasi hafta ataylab vaqtni cho'zishga qarshi qaratilgan qo'shimcha choralarni muhokama qiladi, deb xabar bermoqda The Athletic.

Manbaga ko'ra, o'yinni sun'iy ravishda cho'zishga qarshi choralar qatorida to'p autga chiqqan yoki darvoza zarbasi belgilangan holatlarda to'pni o'yinga kiritish uchun orqaga sanash taymerini joriy etish masalasi ham ko'rib chiqiladi. Shuningdek, futbol qonun chiqaruvchilari almashinuvlar uchun vaqt limitini belgilashni ham muhokama qiladi.

Avvalroq yo'qotilayotgan sof o'yin vaqtini qisqartirish maqsadida, agar darvozabon to'pni qo'lida sakkiz soniyadan ortiq ushlab tursa, burchak zarbasi tayinlash qoidasi joriy etilgan edi.