«Real»da Xabi Alonso aynan klub tomonidan ishdan bo'shatilgani haqidagi xabarlar fonida bayonot berildi
14 YANVAR, 2026, 11:12
Madridning «Real» klubi direktori Emilio Butrageno «qaymoqranglilar» bosh murabbiyi lavozimidan Xabi Alonsoning ketishi masalasi yuzasidan fikr bildirdi. Bu bayonot ispaniyalik murabbiy shartnomani o'zaro kelishuv asosida emas, balki klub rahbariyati tomonidan ishdan bo'shatilgani haqidagi yangiliklar va insaydlar ortidan yangradi.
«Xabi bilan hamkorlik o'zaro kelishuv asosida yakunlandi. Biz unga kelgusida omad tilaymiz», — deya Butragenoning so'zlarini ijtimoiy tarmoq X orqali jurnalist va insayder Fabritsio Romano keltirdi.
Xabi Alonso «Real»ni 2025 yil yozidan beri boshqarib kelayotgan edi. Ungacha u «Bayer» klubida faoliyat yuritgan. «Qaymoqranglilar»ning yangi bosh murabbiyi etib madridliklarning sobiq futbolchisi Alvaro Arbeloa tayinlandi.
