Deku Alonsoning "Real"dan iste'foga chiqarilishi haqida gapirdi

 13 YANVAR, 2026, 14:24

"Barselona" sport direktori Deku Xabi Alonsoning "Real"dan ketishi haqida fikr bildirdi. Madrid jamoasi bosh murabbiyining shartnomasi tomonlar kelishuviga ko'ra bekor qilindi.

"Biz o'z ishimiz bilan bandmiz. Boshqa klublarda nima bo'layotgani haqida o'ylab ko'rmaymiz, ammo "Barselona" va "Real"da bosim tufayli doim qiyin bo'ladi va natija bo'lmaganda, birinchi navbatda murabbiylar aziyat chekadi. Bu biroz ajablanarli, chunki u ko'p vaqt ishlamagan.

Ular Superkubokni boy berishdi, La Ligada 4 ochko ortda qolishmoqda va Chempionlar Ligasida yaxshi o'yin ko'rsatishmoqda.

Bu bizning ishimiz emas. Agar Flik haqida so'rasangiz, mening his-tuyg'ularim raqamlardan ko'ra ko'proq gapiradi. Xansini tayinlar ekanmiz, yaxshi zamonlar qaytib kelishini bilardik", - dedi Deku RAC1’ga bergan intervyusida.