Biroz avval Gonkongda chempion bo'lgan qozog'istonlik tennischi Top-10 reytingida debyut qiladi

 11 YANVAR, 2026, 14:48

Aleksandr Bublik so'nggi bir yilda beshinchi, faoliyatidagi esa to'qqizinchi ATP chempionlik titulini Gonkongdagi turnirda qo'lga kiritdi.

Bu muvaffaqiyat unga faoliyatida ilk bor ATP reytingining Top-10`taligida debyut qilish imkonini beradi. Ayni paytda qozog'istonlik tennischi 11-o'rinni egallab turibdi. Bublik hal qiluvchi final uchrashuvida dunyoning ettinchi raketkasi Lorenco Muzettini mag'lub etishni uddaladi - 7/6(2), 6/3.

Italiyalik tennischi ham yangilanadigan reytingda Top-5`ga ko'tariladi. Aleksandr tennischilarning o'zaro uchrashuvlari hisobida oldinda bormoqda - 3:1. To'qson sakkiz daqiqa davom etgan bahsda Bublik 10, Muzetti 5 ta eys zarbasini amalga oshirgan. 

Aleksandr Bublik Gonkong turniridagi mehnatidan 250 reyting ochkosi hamda 106 460 AQSH dollari miqdorida mukofot puli ishlab oldi. Muzetti esa ketma-ket ettinchi finalida ham mag'lubiyatga uchradi ("CHellenjer" turnirlarni ham qo'shsa to'qqizinchi finalda yutqazdi); u 2022 yildan beri chempion bo'la olmayapti. Italiyalik tennischi 165 ochko va 62 115 dollarga ega bo'ldi.

Manba: olamsport.com