Marokash Kamerunni mag'lub etdi va Afrika millatlar kubogi yarim finaliga yo'l oldi (videosharh)

 10 YANVAR, 2026, 07:24

Afrika millatlar kubogi chorak final bosqichi doirasida Kamerun va Marokash terma jamoalari o'rtasidagi uchrashuv yakunlandi. Bellashuv Marokashning Rabot shahridagi «Prints Mulla Abdulla» stadionida bo'lib o'tdi. O'yinda Marokash futbolchilari 2:0 hisobida g'alaba qozondi.

Uchrashuvdagi hisobni 26-daqiqada madridlik «Real» yarim himoyachisi Brahim Dias ochdi. Ikkinchi bo'limda, 74-daqiqada Ismoil Saybariy marokashliklar ustunligini mustahkamladi.

Shu tariqa, Marokash yarim finalda Jazoir — Nigeriya jufti g'olibi bilan to'qnash keladi.

Ma'lumot uchun, Afrika millatlar kubogi — 2025 musobaqasi Marokashda o'tkazilmoqda. Turnirda olti guruhga bo'lingan 24 ta milliy terma jamoa ishtirok etmoqda. Musobaqa 18 yanvarga qadar davom etadi. Amaldagi chempion — Kot-d’Ivuar terma jamoasi bo'lib, u 2023 yilgi finalda Nigeriyani 2:1 hisobida mag'lub etgan.

Afrika millatlar kubogi — 2025, 1/4 final
9 yanvar 2026 yil, juma. Rabot, «Prints Mulla Abdulla»
Kamerun — Marokash — 0:2
Gollar: 0:1 — Brahim Dias (26), 0:2 — Ismoil Saybariy (74)