Saudiya Arabistonining 5 klubi Muhammad Salohga faol qiziqish bildirmoqda

 10 DEKABR, 2025, 17:24

Saudiya Arabistonining biryo'la beshta klubi - "Al-Hilol", "An-Nasr", "Al-Ittihod", "Al-Ahli" va "Al-Qodisiya" "Liverpul" va Misr terma jamoasi qanot hujumchisi Muhammad Salohga faol qiziqish bildirmoqda, deb yozadi Britaniyaning The Telegraph onlayn nashri.

Avvalroq, Saloh "Liverpul" bosh murabbiyi Arne Slot bilan ziddiyatga borgan edi. Misrlik forvard niderlandiyalik mutaxassisni hurmatsizlikda aybladi. Yakunda Muhammad Angliyada qoldi va Chempionlar Ligasi umumiy bosqichining 6-turidan o'rin olgan "Inter"ga qarshi o'yinni (1:0) o'tkazib yubordi.

Muhammad Saloh mersisaydliklar safida 2017 yil yozidan buyon to'p tepib kelmoqda. "Qizillar" bilan birga vinger APL, Chempionlar ligasi, ichki kuboklar, klublar o'rtasidagi jahon chempionati va boshqa sovrinlarni qo'lga kiritdi.