"Barselona"ga qarshi o'yinda qizil kartochka olgan "Atletik"ning muhim futbolchisi diskvalifikatsiya qilindi

 26 NOYABR, 2025, 18:42

"Atletik" yarim himoyachisi Oyyan Sanset "Barselona"ga qarshi o'yindagi diskvalifikatsiyasi tufayli "Real"ga qarshi maydonga tushmaydi.

22 noyabr kuni "Atletik" La Liga 13-turi doirasida "Kamp Nou"da "Barselona"ga yutqazib qo'ydi (0:4). 52-daqiqada Fermin Lopesning oyog'iga orqadan zarba bergani uchun Sanset qizil kartochka oldi.

Ispaniya Qirollik futbol federatsiyasining musobaqalar bo'yicha qo'mitasi Sansetni "qo'pol va sportga xos bo'lmagan xatti-harakati" uchun jarimaga tortdi va La Liganing ikkita o'yiniga diskvalifikatsiya qildi. Shu tariqa, yarim himoyachi 29 noyabr va 3 dekabr kunlari bo'lib o'tadigan "Levante" va "Real"ga qarshi o'yinlarni o'tkazib yuboradi.

Qayd etilishicha, "Atletik" qo'mita qarori ustidan apellyatsiya berish huquqiga ega.