"Terma jamoaga bormayman": Argentina termasi yulduzi jarohat olganini ma'lum qildi

 9 NOYABR, 2025, 07:42

"Chelsi" yarim himoyachisi Entso Fernandes o'z holati haqida ma'lumot berdi. Shanba kuni "ko'klar" o'z uyida "Vulverxempton"ni mag'lub etdi (3:0). Argentinalik futbolchi o'yinni asosiy tarkibda boshladi va 83-daqiqada zaxiraga olindi.

"Men Argentina terma jamoasi qarorgohiga bormayman. Hozirgina shifokorlar bilan bir necha oydan beri azob chekayotgan tizzamdagi muammo haqida gaplashdim. Oxirgi haftada o'yinlarning tig'iz taqvimi tufayli vaziyat yomonlashdi," - dedi Fernandes o'yindan keyingi intervyusida.

"Chelsi"ning keyingi o'yini terma jamoalar o'rtasidagi xalqaro tanaffusdan so'ng, 22 noyabr kuni bo'lib o'tadi - raqib "Byornli" bo'ladi.