"Chelsi"ning 12 nafar futbolchisi APL navbatdagi turini o'tkazib yuboradi

 25 DEKABR, 2023, 08:36

"Chelsi" 27 dekabr kuni bo'lib o'tadigan "Kristal Pelas"ga qarshi APL 19-tur uchrashuvi oldidan bir qator asosiy tarkib futbolchilarisiz qoldi.

"Vulverxempton"ga qarshi o'yinda (1:2) Lesli Ugochukvu jarohat oldi. Koul Palmer va Raxim Sterling ham mavsumdagi beshinchi sariq kartochkalarini olishdi va endi diskvalifikatsiya tufayli bittadan o'yinni o'tkazib yuborishadi.

Moyses Kaysedo va Entso Fernandes kasallik tufayli “bo'rilar”ga qarshi o'yinni o'tkazib yuborishgandi.

Shuningdek, Ben Chiluell, Robert Sanches, Trevo Chaloba, Karni Chukvuemeka, Mark Kukurelya, Uesli Fofana va Ris Jeyms ham jarohatdan tiklanishda davom etmoqda.

"Chelsi" Premer-ligada 10-o'rinda bormoqda.