Kim unga ega chiqadi? Bellingem uchun da'vogar besh klub
9 DEKABR, 2022, 12:30
Bellingem Jahon chempionatida porlayotgan nomlardan biri sanaladi. 19 yoshli yarim himoyachi uchun allaqachon top-klublar da'vo qila boshlagan. 2021 yilda «Borussiya Dortmund» Bellingem bilan yangi bitim tuzgandi. Bugun esa jahon sahnida uning nimalarga qodir ekani ayon bo'lmoqda. Oktyabr oyida Jud Bellingem o'zi haqidagi mish-mishlar haqida shunday degandi: «Sizlar (matbout) mendan jahlingiz chiqishi mumkin. Chunki sizlar kutgan voqea men bilan sodir bo'lmayapti. Ammo mening fikrim faqat jamoamning keyingi o'yiniga qaratilgan».
Quyida Angliya terma jamoasi a'zosining ehtimoliy besh manzili haqida gap boradi.
«Liverpul»
Mersisaydliklar Bellingemni sotib olishga eng jiddiy da'vogarlardan biridir. Bunda «Liverpul»ning yarim himoyadagi muammolari bilan birga Kloppning «BVB» bilan aloqalari muhim o'rin tutishi kutilmoqda. Qolaversa, Bellingem «qizillar» sardori Jordan Xenderson bilan yaxshi aka-ukachilik munosabatlariga ega.
«MYu»
Yozda yarim himoya uchun Kazemiro va Eriksen keltirildi. Ammo jamoaga yana bir maydonning har ikki tomonidan o'ynay oladigan futbolchi zarur. Fred va Maktominay bu darajada emas. Bellingemning «MYu»ga bo'lgan moyilligi bor desak xato qilamiz. Ammo baribir «qizil iblislar» poygada qatnashib ko'radi.
«Manchester Siti»
Amaldagi Angliya chempionlari maydon markazi uchun Kalvin Fillipsni xarid qilgandi. Ta'sir jihatdan bu transfer nolga teng bo'ldi. Ammo Bellingemning kelishi Gvardiolaga yanada katta imkoniyatlar beradi.
«Chelsi»
Bu klubning yangi egasi bo'lmish Todd Byoli 19 yoshli futbolchiga jiddiy qiziqib qolgan. Boz ustiga, Kante va Jorjino mavsum so'ngida erkin agentga aylanadi. Shu sabab «Chelsi»ga Bellingem kabi futbolchi zarur.
«Real Madrid»
Bellingemga qiziquvchilar orasida «qirollik klubi» ham mavjud. Evropa chempionlari uni sotib olishga qattiq ishonmoqda. Ha, bu yo'lda hattoki «Real» ham katta qiyinchilikka duch kelishi mumkin. Ammo Bellingem kabi futbolchilarga erishish Florintino Peresga qiyinchilik tug'dirmaydi.
ISMATOV J.
