Mundial: turfa ranglar jilosi

 8 DEKABR, 2022, 13:01

Mana, Qatar-2022 mundialida «pley-off» o'yinlari - «hayot-mamot» janglari ham boshlanib ketdi.

Buyog'iga mag'lubiyat JCh bilan xayrlashishni anglatadi. Bor e'tibor jahon chempionatiga qaratilgan ekan, gazetamiz nigohi ham turnir atrofidagi voqeliklarda, albatta.

SENSATsIYaLAR GULDASTASI

Guruh bahslaridayoq qanchadan-qancha sensatsion natijalar kuzatildi. Ularni asosan OFK jamoalari qayd etgani yoqimli, albatta. Ayniqsa, FIFA reytingida 51-o'rinni egallab turgan Saudiya Arabistoni jamoasi 3-pog'onadagi argentinaliklarni dog'da qoldirgani og'ir tosh bosadi.

MEZBONLARDA HAMMASI ANTI

Qatar mundialga ko'p va xo'p tayyorlangani aniq. Ammo mezbon jamoaning natijasi barchasini qisman yuvib yubordi. Har holda, Qatar termasi bir qator antirekordlar tufayli JCh tarixidagi eng noshud mezbon maqomini oldi.

IKKI BUYuK NATIJA

Argentina milliy jamoasi etakchisi Lionel Messi JCh tarixida muayyan o'yinda ham gol urgan, ham assistentlik qilgan eng yoshi katta futbolchiga aylandi. U vaqtida shunday natijaga erishgan eng yosh futbolchi maqomini olgandi.

ChINAKAM GOLEADOR

Lionel Messining asosiy raqobatchisi - Krishtianu Ronaldu esa JChda Portugaliya milliy jamoasi uchun gol urgan eng yoshi katta futbolchi bo'ldi. U bundan 16 yil muqaddam Portugaliya termasining mundialda gol nashidasini surgan eng yosh vakili sifatida rekord o'rnatgandi.

ISPANChA DOVUL

Ispaniya milliy jamoasi guruh raundi 1-turida Kosta-Rika termasini 7ta javobsiz gol bilan «siyladi». 7:0 - bu JCh tarixida kuzatilgan eng yirik hisobli g'alabalar ro'yxatida 7-natija. Rekord esa 1982 yili Vengriya - Salvador o'yinida qayd etilgan - 10:1.

O'ZGARMAS REKORDLARMI?

JCh tarixida bir qator rekordlar borki, ularning yangilanishi - qiyin masala. Masalan, frantsiyalik Jyust Fonten bitta turnirda 13ta gol urgan. Bunaqasini tasavvurga sig'dirish qiyin, garchi hozirda mohir to'purarlar zamonida yashayotgan bo'lsakda...