To'lqin Qilichev: «Bahodir Jalolov – terminator!»
7 DEKABR, 2022, 18:54
Ertaga Toshkentda boks bo'yicha kattalar o'rtasidagi O'zbekiston chempionati start oladi. 14 dekabrga qadar davom etadigan musobaqada yurtimizning eng kuchli charm qo'lqop ustalari g'oliblik uchun kurash olib borishadi. Bugun O'zbekiston Milliy Olimpiya qo'mitasida mazkur chempionatga bag'ishlangan matbuot anjumani bo'lib o'tdi. Unda O'zbekiston boks federatsiyasi mutasaddilari va terma jamoa murabbiylar shtabi musobaqadan nimalar kutilayotgani, chempionatda qatnashadigan taniqli sportchilar, yangi yilga qo'yilgan rejalar xususida gapirib o'tishdi.
Anjumanni O'zbekiston boks federatsiyasi bosh kotibi Shohid Tillaboev olib bordi. Shuningdek, erkaklar terma jamoasi bosh murabbiyi To'lqin Qilichev hamda murabbiy Xuan Enrike, ayollar terma jamoasi bosh murabbiyi Elshod Rasulov, katta boks oilasi va OAV xodimlari ishtirok etishdi.
Dastavval federatsiya bosh kotibi musobaqa haqida atroflicha ma'lumot berdi. Unga ko'ra, bu yil ham janglarni baholashdagi shaffoflikni ta'minlash maqsadida xorijdan tashrif buyuradigan 10 nafar 3 yulduzli AIBA hakamlari ishlashadi. Bahslar 2 ringda o'tkazilib, «UzReport TV» va YouTube ijtimoiy tarmog'idagi «Tigers» sahifasida jonli efirga uzatiladi.
O'z navbatida To'lqin Qilichev musobaqada ishtirok etadigan yulduz bokschilar haqida to'xtaldi. Uning ma'lum qilishicha, Hasanboy Do'smatov, Bahodir Jalolov, Miraziz Mirzahalilov kabi nomdor bokschilar ham chempionatda qatnashishadi. Madiyar Saidrahimov, Abdumalik Xalakov, Ruslan Abdullaev jarohati sabab unda ishtirok eta olishmaydi.
«Jalolov Abu-Dabida IBA tomonidan o'tkaziladigan musobaqada (11 dekabr) jang qiladi. Shuningdek, O'zbekiston chempionatida ham qatnashadi. Bahodir – terminator! Buning ortida mamlakatimiz sha'ni, manfaati turibdi», – dedi T.Qilichev.
Shuningdek, Xuan Enrike hamda Elshod Rasulov ham o'z fikrlarini bildirib o'tishdi. Xususan, kubalik mutaxassis bu musobaqa kelasi yil Toshkentda o'tadigan jahon chempionatiga terma jamoa tarkibini saralab olish yo'lida juda muhim ekanini ta'kidladi.
Anjuman davomida OAV vakillari hakamlik, yangi yildagi rejalar va boshqa yo'nalishlardagi o'zlarini qiziqtirgan savollariga atroflicha javob olishdi.
