Qatar-2022. Final oldidan final: Angliya va Frantsiya tarkibidan tuzilgan ramziy terma jamoa

 5 DEKABR, 2022, 19:48

Angliyaning nimchorak finaldagi Senegalga qarshi 3-0 hisobidagi g'alabasi, musobaqaning keyingi bosqichida "titanlar to'qnashuvi" bo'lishini ta'minladi. Chorak finalda inglizlar amaldagi chempion bo'lmish, Frantsiya termasiga qarshi chiqishadi. Dide Desham shogirdlari kuni kecha Polshani 3-1 hisobida mag'lub etgandi. Ayni damda frantsuzlar ikki marta ketma-ket jahon chempioni bo'lish orzusida yonmoqda. Bu ishni tarixda faqatgina Braziliya va Italiya eplay olgan xolos (1958, 1962; 1934, 1938). Ammo bu yo'lda to'siqlar bor. Shulardan biri Garet Sautgeyt boshchiligidagi "Uch sherlar"dir. Ayni damda Angliya ajoyib formada va musobaqa boshlanganidan buyon 12 ta gol urishga erishdi. Bu ish Bellingem, Saka, Foden, Keyn kabi yulduzlar orqali bajarildi. Quyida ingliz va frantsuz futbolchilaridan tuzilgan ramziy terma jamoaga e'tibor qaratamiz.

Doimgidek darvozabon nuqtasidan boshlaymiz. Jordan Pikford bu nuqtada tanlab olinadi. "Everton" futbolchisi turnir davomida 3 marta quruq o'yin o'tkazdi. Angliya umumiy hisobda ochiq o'yin amaliyotida raqiblardan faqat bitta to'p qabul qilib olgan. Frantsiyada esa bu statistika yaxshi emas. Loris 4 ta o'yinning birortasini ham quruq yakunlamadi.
Himoya har ikki tomonga teng bo'linadi. Kayl Uoker chap qanotda harakat qiladi. O'ng esa Teo Ernandesga topshiriladi. Teo bu o'rinda Lyuk Shoudan ustun qo'yildi. Markazdan Dayo Upamekano va Xarri Maguayr joy olgan. Maguayr, kutilganidek, terma jamoa safida o'zini ko'rsata olmoqda. Bu orqali u ushbu ramziy terma jamoada o'zining klubdoshi bo'lgan Rafael Varandan ustun qo'yildi.

Yarim himoya uchta pozitsiyadan ikkitasini inglizlar egallagan. Deklan Rays va Jud Bellingem ishonchli o'yinlari bilan turnir davomida porlashni davom ettiradi. Frantsiyada Kante va Pogbaning yo'qligi bu erda "uch ranglilar"ga pand berdi. Maydon markazining uchinchi vakili Antuan Grizmanndir. U ham xuddi Maguayr kabi, klub va terma jamoada ikki xil ko'rinishga ega.

Hujumda uchta katta nom mavjud. Shu bilan birga ayrim yulduzlarni tanlash imkoniyati yo'q. Albatta, bu borada, avvalo, o'yin sifatiga qaraladi. Mbappe, Keyn, Saka triosi hujumni tashkil etib berishadi. Mbappe joriy mundialning eng yaxshi to'purari bo'lib turibdi. Keyn esa dunyoning kuchli hujumchisidir. Uning kreativ salohiyatini e'tiborga olmasdan iloj yo'q. Saka Angliyaning 3 ta goliga mualliflik qildi. Shu sabablar bilan yuqoridagi uchta nom afzal ko'rildi.

Afsuski, hujumda Dembele, Foden, Koman, Grilish va Reshfordni qo'ya olmadik. Shuningdek, Olive Jiru ham Frantsiya tarixidagi eng zo'r to'purar bo'lishiga qaramay, ro'yxatimizdan chetda qoldi.

ISMATOV J.