logotip
Assalom-u alaykum, Mehmon!
Soat: 00:21
KirishA'zo bo'lish
Nega Ashurmatovga imkon berilmadi?

25 DEKABR, 10:27 191

.

Kun mavzusi.

O‘tgan hafta oxirlarida milliy futbolimizda shov-shuvli xabar tarqaldi. Joriy yilda AGMK jamoasini O‘zbekiston kubogida g‘oliblik sari etaklab kelgan mutaxassis Baxtiyor Ashurmatovning o‘rnini shu kunga qadar “Bunyodkor”ni boshqarib kelgan Mirjalol Qosimov egalladi.

Xush, buning nimasi yomon, deyishingiz mumkin.

Bir qarashda buning yomon jihati yo‘q, shunchaki tajribasi hiyla kam murabbiyning o‘rniga undan tajribaliroq bo‘lgan mutaxassis tayinlandi. Qolaversa, bu holatni AGMK kelgusi yil start oladigan Osiyo Chempionlar ligasida o‘z oldiga jiddiy maqsadlarni qo‘yayotgani bilan ham izohlash mumkin. Ammo masalaning boshqa jihati ham borki, unga to‘xtalmasdan o‘tolmaymiz.

Gap shundaki, Baxtiyor Ashurmatov yosh, izlanuvchan murabbiy. 42 yoshli mutaxassis futbolchilik faoliyatini tugatgach, qisqa muddat ichida “Guliston”, “Bunyodkor” (yordamchi murabbiy), “Navbahor”, “Andijon”, “Buxoro” (texnik direktor) hamda AGMK klublarida ishladi. Ta’bir joiz bo‘lsa aytish kerak, Baxtiyor A’zamovich qaerda faoliyat olib bormasin, o‘zidan yaxshi nom qoldirishga intildi. Birda bunga erishdi, ba’zida esa...

To‘g‘ri, yakuniga etgan mavsumda AGMK mamlakat kubogida g‘alaba qozongani bilan Superliganing ikkinchi bosqichida ancha bo‘sh o‘ynadi. Ehtimol mana shu omil Ashurmatov iste’fosiga sababchi bo‘lgandir. Axir milliy chempionatimizda raqobatbardosh jamoani shakllantira olmagan mutaxassis bilan OChLda yuksak marralarni ko‘zlash mumkinmi?

Lekin shuni ham unutmaslik kerak, Baxtiyor A’zamovich AGMKni mavsum boshida emas, balki o‘rtasida qabul qilib oldi. Unga Kumikovdan abgor ahvoldagi jamoa qolgan, tarkibni kuchaytirishning esa imkoni deyarli yo‘q edi. Chunki bu paytda yaxshi saviyadagi futbolchilarning barchasi u yoki bu jamoaga bog‘langandi. Shunga qaramay B.Ashurmatov qisqa muddat ichida jamoadagi vaziyatni o‘nglashga erishdi, asosiy e’tibor O‘zbekiston kubogiga qaratildi va Olmaliq jamoasi bu musobaqada o‘z me’yori bilan o‘lchaganda misli ko‘rilmagan qahramonlik ko‘rsatdi. Yarim finalda “Bunyodkor”, finalda esa “Paxtakor” mag‘lub etildi.

Biroq, endi bundan ne foyda: bo‘lar ish bo‘ldi, hukm allaqachon o‘qildi. Faqat meni o‘ylantirayotgani, nega bizda yosh kadrlarga imkon berilmaydi? AGMK klubi rahbariyati bugun Qosimovga va’da qilinayotgan sharoit va imkoniyatlarni Ashurmatovga ham yaratib berganida, ehtimol biz ajoyib bir murabbiyni kashf qilgan bo‘larmidik?!

Nima ham derdik, bu ham o‘zbek futbolining o‘ziga xos “taraqqiyot modeli”da, ya’ni eksperiment qilishga botinolmasdan, sinovdan o‘tgan tizimni qayta-qayta ishlataverish. Faqat bu tizimni yaxshi o‘zlashtirib olgan raqiblarimiz bizni har bobda engib ketmoqda, biz esa unga qarshi chora qo‘llashda yana eskirgan uslublarni qo‘llashda davom etmoqdamiz. Xo‘sh, bu usul bilan o‘zbek futboli taraqqiy etishi mumkinmi? Xulosa esa sizdan.
Yangiliklarni Telegramda o'qing!
BILDIRILGAN FIKRLAR
QIZIQARLI FAKT VA IQTIBOSLAR
BOSH SAHIFA
ONLINE: 0 / 19